Көкарал бөгетін реконструкциялау жыл соңына дейін аяқталады – Су министрлігі

АСТАНА. KAZINFORM – «Көкарал бөгетін сақтау және Сырдария өзенінің сағаларын қалпына келтіру» жобасы аяқталуға жақын. Бұл туралы ҚР Су ресурстары және ирригация министрлігінің ресми өкілі Мөлдір Әбдуалиева айтты.

— «Көкарал бөгетін сақтау және Сырдария өзенінің сағаларын қалпына келтіру» жобасы аяқталуға жақын. Министрлік жыл соңына дейін Солтүстік Аралды Үлкен Арал теңізінен бөліп тұрған Көкарал бөгетін реконструкциялау жұмысын аяқтауды жоспарлап отыр. Бұл Солтүстік Аралды сақтауға, судың тұздылығын одан әрі азайтуға және аймақтағы экологиялық жағдайды жақсартуға көмектеседі, - деді ол ОКҚ алаңында.

Сондай-ақ ресми өкіл министрлік Дүниежүзілік банкпен бірге 39 жобаны қамтитын «Солтүстік Арал теңізін сақтау» жобасының екінші кезеңін әзірлегенін айтты. 

— Бұл жобаның қандай пайдасы болады? Бұл 2000 адамды тұрақты жұмыспен қамтамасыз етуге, Қызылорда облысының ауыл шаруашылығы мен балық аулау кәсібін дамытуға, қосымша жұмыс орындарын ашуға, өңірдегі экономикалық және әлеуметтік жағдайды жақсартуға мүмкіндік береді, - деді Мөлдір Әбдуалиева.

Бұған дейін ол Солтүстік Аралға наурыздың соңына дейін 1,6 млрд текше метр су жіберілетінін айтты.

Айта кетейік, Солтүстік Аралды сақтау жобасының алғашқы кезеңінің нәтижесінде теңіздегі су 42%-ға ұлғайды.