Көкшетауда бүгін түнде жылыту маусымы аяқталады

КӨКШЕТАУ. KAZINFORM – Облыс орталығы тұрғындарының пәтерлеріне жылу беру 24 сәуірде сағат 24:00-де тоқтатылады.

Көкшетау қаласы әкімдігі баспасөз қызметінің мәліметінше, белгіленген нормативтерге сай, ауа райы жағдайларын ескере отырып және тұрғындардың көптеген өтінішіне орай қала әкімі Әнуар Күмпекеев 2025 жылғы 24 сәуірде сағат 24:00-де жылу беруді тоқтатуға шешім шығарды.

— Нормативке сәйкес жылыту жүйесі ауаның орташа тәуліктік температурасы +10 °С және одан жоғары деңгейде тұрақтанған кезде өшіріледі. Қазіргі климаттық жағдайлар осы талапқа сәйкес келеді. Бұл жылу желілерінің жазғы жұмыс режиміне көшу қажеттілігін растайды, - деп атап өтті ведомстводан.

Қала әкімдігі жылу жүйесінен ажыратуды жауапкершілікпен атқару қажеттігін ескертті. Бұл төтенше жағдайлардың алдын алу және жылу желілерінің тұрақты жұмысы үшін қажет.

— Сонымен қатар жылу жүйесіне артық қысымның түсуін болдырмау үшін мамандар жылу пункттерінен кейін көрінетін үзілістерді орындауы керек. Бұл шаралар жабдыққа қосымша жүктемелер туындамай, жаңа маусымға қауіпсіз өтуге бағытталған, - деп түйіндеді ведомстводан.

Бұған дейін Астанада жылыту маусымы аяқталғанын жазған едік.