Қонаев қаласындағы ескі гараждар бұзылып, орнына басқа нысандар салынады

ҚОНАЕВ. KAZINFORM – Қонаев қаласының Бас жоспарына сәйкес, қаладағы 7 гараж кооперативі (ГК) бұзылып, орнына басқа мақсаттағы нысандар бой көтереді. Бұл туралы Қонаев әкімдігінің баспасөз қызметі хабарлады. 

Әкімдік мәліметіне сәйкес, сүрілген гараждардың орнына әкімшілік және қызмет көрсету нысандарын, тұрғын үй кешендерін салып, ауамақты абаттандыру көзделіп отыр.

– Аталған мәселеге байланысты тұрғындар әкімдіктен гараждарды жеке меншікке өткізуді сұрауда. Сәулет және қала құрылысы бөлімі бұл – мүмкін емес екенін айтады. Себебі Бірыңғай мемлекеттік Жылжымайтын мүлік кадастрының деректеріне сәйкес, мұндағы жер учаскелері қысқа мерзімге уақытша пайдалануға берілген. ҚР Азаматтық кодексінің 209-бабы 4-тармағы бойынша ортақ меншiк екi немесе бiрнеше адамның меншiгiне мүлiк түскен кезде пайда болады, оны өзiнiң мақсаты өзгертiлмейiнше бөлуге болмайды, - деп хабарлады әкімдіктен.

Сондай-ақ Қонаев қаласының басшылығы бұл нысандар мемлекет қажеттілігі үшін алынғанда немесе инвесторларға берілгенде үлескерлерге өтемақы төленетінін хабарлады.

– Халық Бас жоспардың не үшін қабылданғанын түсінуі қажет. Біздің жоспардың орындалу мерзімі 2050 жылға дейін жоспарланған. Оның ішінде экономиканы дамыту, халықты жұмыспен қамту, автожолдарды кеңейту және салу, инженерлік желілерді тарту, абаттандыру, әлеуметтік, мәдени, әкімшілік нысандарды салу, тұрғын үйлерді тұрғызу секілді маңызды салалар қамтылған. Ерте ме, кеш пе, гараждар бұзылып, орнына бас құжатқа сәйкес ғимараттар салынады. Сондықтан тұрғындарды заң аясында жұмыс істеуге шақырамыз, - деді сәулет және қала құрылысы бөлімінің басшысы Руслан Ботамбаев.

Айта кеткен жөн, бұл мәселеге байланысты Қонаев қаласы, №2 ш/а, 44-үй мекенжайында орналасқан сәулет және қала құрылысы бөліміне жолығуға болады.

Еске салайық, Алматы облысында биыл 800-ден астам тұрғын интернет-алаяқтарға алданған.