Коронавирус: ШҚО әкімдігі зертханалардағы ұзын-сонар кезекті түсіндірді
ӨСКЕМЕН. ҚазАқпарат – Әлеуметтік желілерде Өскемен және Семей қалаларында ПТР-тест тапсырушылардың ұзын-сонар кезекте тұрғаны туралы ақпарат тараған болатын. Бұған қатысты ШҚО Тауарлар мен көрсетілетін қызметтердің сапасы мен қауіпсіздігін бақылау департаментінен жауап берді, деп хабарлайды ҚазАқпарат тілшісі.
Департаметтің баспасөз қызметі таратқан мәліметке сүйенсек, қазіргі таңда аталған мәселе шешіліп, кезек азайған.
«Әлеуметтік желілерде Өскемен және Семей қалаларының тұрғындары зертханаларда ПТР-тест тапсыра алмағандығы туралы ақпарат тарады. 2 қараша күні таңертеңнен бастап сағат 12.00-ге дейін мұндай жағдайдың орын алғаны рас. Алайда тиісті шаралар қолданылғаннан кейін кезек бірден қысқарды», - делінген хабарламада.
3 қарашадан бастап облыстық Репродуктивті медицина орталығы мен «InVitro+» зертханаларында COVID-19-ға сынама алу үшін қосымша пункттер ашылмақ.
«Жалпы өңір бойынша сынамалармен 10 зертхана жұмыс істейді. Онда тәулігіне 7 мыңнан астам зерттеу жұмыстарын жүргізуге болады. Айта кетейік, осы уақытқа дейін облыста 298 547 зерттеу жүргізілген», - деді ведомство өкілдері.
