Қостанай облысында 17,4 млн теңгеге медициналық жабдық сатып алу кезінде заңбұзушылық анықталды
АСТАНА. KAZINFORM – Қостанай облысының Федоров ауданында медициналық жабдықтарды мемлекеттік сатып алу кезінде бәсекелестікті шектеу белгілері анықталды.
Федоров ауданының прокуратурасы аудандық ауруханада медициналық жабдық сатып алуға бөлінген бюджет қаражатының жұмсалу заңдылығына талдау жүргізген.
Тексеру барысында сатып алынатын жабдықтардың техникалық сипаттамалары нақты модельдер мен өндірушілерге бағытталғаны белгілі болды. Құжаттарда жабдықтың сипаттамалары тым егжей-тегжейлі көрсетіліп, басқа жеткізушілердің сатып алуға қатысу мүмкіндігін шектеген.
– Бұл Қазақстан Республикасының мемлекеттік сатып алу туралы заңнамасына, адал бәсекелестік, өнім берушілердің теңдігі және бюджет қаражатын тиімді пайдалану қағидаттарына қайшы келеді, – делінген прокуратура хабарламасында.
Бұған дейін жүргізілген сатып алуларды зерделеу мұндай тәжірибенің ауруханада бұрын да қолданылғанын көрсеткен. Атап айтқанда, гастробейоскоптар, суару сорғылары, зертханалық микроскоптар, операциялық үстелдер, пациент мониторлары және басқа да медициналық бұйымдарды сатып алу кезінде осындай жағдайлар анықталған.
Прокуратура аталған тәжірибенің жүйелі сипат алғанын ескеріп, талдау нәтижелерін Қостанай облысының барлық аумағында жүргізілетін қадағалау іс-шараларында пайдалануға жіберді.
Айта кетейік, ШҚО-да жануарларды қорғау мекемесінен 11,3 млн теңгенің заңбұзушылығы анықталды.
