Қостанай облысында операция кезінде науқас қайтыс болды
ҚОСТАНАЙ. KAZINFORM — Қостанай облысында мобильді топтан медициналық көмек алған науқастың өліміне байланысты тергеу басталды.
Қостанай облыстық денсаулық сақтау басқармасы әлеуметтік желіде ер адамның операция үстелінде қайтыс болғаны туралы жазбадан кейін көпшіліктің назарын аударған жағдайға қатысты пікір білдірді. Хабарламада ота жасап жатқан нейрохирург мас күйінде болғандығы және операциядан кейін бірден кетуге әрекеттенгені айтылады.
Облыстық жедел жәрдем станциясының мәліметінше, оқиға санитарлық авиация науқасты Арқалық қаласындағы ауруханаға жөнелткен соң болған. Науқасқа шұғыл нейрохирургиялық операция қажет болғандықтан, Арқалық қаласына облыстық аурухананың маманы жіберілген.
— Дәрігер оқиға орнына арнайы жедел жәрдем көлігімен жеткізілді. Ол көлік жүргізбеді. Операция алдында барлық міндетті процедуралар жүргізілді. Яғни, науқасты анықтау, операция жасалатын аумақты, бригаданың дайындығын тексеру. Операция бөлмесінде кем дегенде 6 маман бар, сондықтан біреудің адекватты емес күйін жасыру мүмкін емес, — деп түсіндірді Қостанай облыстық жедел жәрдем станциясының басшысы Олег Мелешенко.
Ол сондай-ақ санитарлық авиация қызметінде кадр тапшылығы қатты сезіліп жатқанын, сондықтан басқа медициналық мекемелердің мамандары да шақыртуға тартылып жатқанын атап өтті.
Сондай-ақ «Senim» денсаулық сақтау қызметкерлері кәсіподағының облыстық филиал төрағасы Татьяна Булгацевич «Халық денсаулығы және денсаулық сақтау жүйесі туралы» Кодекстің 270-бабына сәйкес қызметтік тексеру жүргізіліп жатқанын мәлімдеді. Құрамында тәуелсіз сарапшылардан тұратын комиссия медициналық қызметкерлердің іс-әрекетін бағалап, науқасқа көмек көрсетуде қателіктердің бар-жоғын анықтайды.
Тергеу қорытындысы сот-медициналық сараптама мен сараптама комиссиясының қорытындысын алғаннан кейін белгілі болады.
Қазір полиция қызметкерлері Арқалық қаласында операция кезінде науқастың өліміне қатысты сотқа дейінгі тергеу басталғанын жеткізді.
Айта кетейік, Шымкентте ер адам науқасты соққыға жығып, ауруханада полицияға қарсылық білдірген.
