Қостанай облысында жеңгетайлық әрекеттердің жолы кесілді

ҚОСТАНАЙ. 2 қазан. ҚазАқпарат - Қостанай облысы ІІД ұйымдасқан қылмысқа қарсы күрес жөніндегі қызметкерлер «Нелегал» жедел-алдын алу іс-шарасы барысында кәмелетке толмағандарды жезөкшелікпен айналысуға тарту және жеңгетайлық фактілерін анықтады.

Меңдіқара ауданы Михайловка кентінде бірі кәмелетке толмаған екі қыз баланы жезөкшелікпен айналысуға мәжбүрлеген 27 жастағы жергілікті тұрғын және оның 18 жастағы жолдас қызы ұсталды. Жәбірленушілерді олар өз үйлерінде ұстаған, ұрып-соққан. Олар алдын ала клиенттермен келісіп, қыз балаларды Қостанайға алып келген.

Полицейлер күдіктілердің пәтерінен пневматикалық тапаншаны, клиенттердің тізімдері сақталған ұялы телефондарды тәркіледі. Күдіктілерге қатысты екі қылмыстық іс қозғалды.

Сондай-ақ, жедел қызметкерлер сауналар мен моншаларда рейд жүргізді. Рудный қаласында 40 жастағы клиентке 29 жастағы қыз баланы 5 мың теңге ақшалай сыйақыға жыныстық қызмет көрсету үшін пайдалануға берген саунаның әкімшісі ұсталды. «Жеңгетайлық» бабы бойынша қылмыстық іс қозғалды. Осыған ұқсас жағдай Қостанай қаласында тіркелді, деп хабарлайды ІІД баспасөз қызметінен.