Қостанайда айтыскер ақын Салтанат Өтелбаева мен жолдасы жол апатынан көз жұмды
АСТАНА. KAZINFORM – Айтыскер ақын, мәдениет саласының үздігі, тарих ғылымдарының магистрі, Ыбырай Алтынсарин мемориалдық музейі басшысының орынбасары Салтанат Өтелбаева жол-көлік оқиғасынан қаза тапты.
Қаралы хабарды әріптесі Марғұлан Оспанов әлеуметтік желідегі парақшасында жеткізді.
– Бүгін айтыскер ақын, мәдениет саласының үздігі, тарих ғылымдарының магистрі, Ыбырай Алтынсарин музейі басшысының орынбасары Салтанат Өтелбаева жол апатына түсіп, жұбайы Мырзабек Қасымов екеуі де қаза тапты, – деп жазды ол.
Марғұлан Оспановтың айтуынша, Салтанат Амантайқызы саналы ғұмырын мәдениет пен музей ісіне, тарихи-мәдени мұраны сақтау мен насихаттауға арнаған.
Ол өз ісінің білікті маманы ретінде жоғары кәсібилігімен, жауапкершілігімен және ұйымдастырушылық қабілетімен ерекшеленді. Оның жетекшілігімен музейде көптеген маңызды жобалар, көрмелер мен ғылыми-зерттеу жұмыстары жүзеге асырылды.
Әріптестері арасында зор құрметке ие болған Салтанат Өтелбаева ашық мінезді, мейірімді әрі парасатты жан ретінде есте қалды.
– Оның адал еңбегі, туған елге деген сүйіспеншілігі мен азаматтық ұстанымы кейінгі буынға өнеге болып қала береді. Отбасы мен туған-туыстарына қайғырып көңіл айтамын, – деді әріптесі.
Осыған дейін әйгілі қазақ ақыны, драматург, қоғам қайраткері, Қазақстанның Еңбек Ері, Халық жазушысы Мұхтар Шаханов 84 жасқа қараған шағында дүниеден өткенін жазғанбыз.
