Қостанайда жаңа денсаулық сақтау нысандарының құрылысы аяқталып келеді
ҚОСТАНАЙ. Қыркүйектің 16-сы. ҚазАқпарат /Петр Плахотников/ - Алдағы күндері Қостанайда жаңа денсаулық сақтау нысандарындағы құрылыс жұмыстары аяқталады. Облыс әкімі Сергей Кулагин облыстық қан орталығының, емхана мен көпбейінді аурухананың құрылыс алаңдарында болды.
Қан орталығының сметалық құны 3 млрд. теңге. Жаңа мекеме жылына 18 мың литр қан дайындауға арналған. Аймақ басшысы нысандағы барлық құрылыс-монтаждау жұмыстары іс жүзінде аяқталып қалғанына көз жеткізді.
Қостанайдың 9-шы шағын ауданында салынған, бір ауысымда 500 науқасты қабылдай алатын жаңа емхана республикалық бюджет есебінен салынып жатыр. Жобаның құны 2 млрд. теңгеге жуық қаражатты құрайды. Қазір нысандағы қалған құрылыс жұмыстары аяқталуға жақын. С.Кулагин екі нысанның да үстіміздегі жылғы қарашаның 25-нен қалмай пайдалануға беріледі деп сенеді.
Облыс әкімі сондай-ақ облыстық көпбейінді аурухананың құрылысымен де танысты. Аурухана 300 орынға арналған, жобаның құны 6,2 млрд. теңге.
