ҚР АШМ-ға қарасты «Фитосанитария» кәсіпорнының басшысы тергеуге алынды
ҚР Ауыл шаруашылығы министрлігіне қарасты «Фитосанитария» ШЖҚ РМК бас директоры лауазымды өкілеттігін асыра пайдаланды деген күдікке ілінді. ҚазАқпарат бұл туралы Сыбайлас жемқорлыққа қарсы іс-қимыл агенттігіне сілтеме жасап хабарлайды.
«Алматы қаласы бойынша Сыбайлас жемқорлыққа қарсы қызмет ҚР Ауыл шаруашылығы министрлігі Агроөнеркәсіптік кешендегі мемлекеттік инспекция комитетінің «Фитосанитария» ШЖҚ РМК бас директорына қатысты сотқа дейінгі тергеу жүргізіп жатыр», - делінген мәліметте.
Мекеме басшысы белгіленген тыйымға қарамастан кәсіпкерлік ұйымды құрып, оны басқарған. Онымен қоса, кәсіпкерлікке 2022 жылдың маусымнан бастап қазіргі уақытқа дейін «Фитосанитария» ШЖҚ РМК Алматы облыстық филиалына тиесілі үй-жайды тегін беріп келген.
«Күдіктінің іс-әрекетінен мемлекетке келтірілген залал құны 7,4 млн теңгені құрады. Сотқа дейінгі тергеу жалғасып жатыр.Қылмыстық-процестік кодексінің 201-бабына сәйкес тергеу мүддесі үшін өзге ақпарат жария етуге жатпайды», - делінген ақпаратта.
Антикор еске салып өткендей, Конституцияның 77-бабы 3-тармағының 1-тармақшасына және Қылмыстық-процестік кодексінің 19-бабы 1-бөлігіне сәйкес, сот үкімі заңды күшіне енгенге дейін күдікті кінәсіз деп есептеледі.
