ҚР Көлік және коммуникация министрі Маңғыстау облысында іссапармен болып қайтты

деп хабарлайды ҚазАқпарат тілшісі.Сапар барысында Ақтау халықаралық әуежайы мен «Ақтау-Құрық» тас жолының құрылысы барысымен танысқан министр «Ералиев-Құрық» теміржол телімінің алғашқы рельсін төсеу салтанатына қатысты. Одан соң астаналық мейман «Ерсай» компаниясында болды. Концессиялық келісім негізінде жүргізіліп жатқан Ақтау халықаралық әуежайының жаңа жолаушылар терминалы мен қайтадан төселіп жатқан ұшу-қону жолағындағы жұмыстар кезең бойынша жүргізілуде. Құрылысын Түркияның «Туркуаз Инвест» ЖШС жүргізіп жатқан жаңа жолаушылар терминалында 2 телескопиялық элеватор саты, төлқұжаттық кабиналар, автоматтандырылған қауіпсіздік жүйесі, VIP, CIP залдары, дәмхана, мейрамхана, дүкендер, ана мен бала бөлмесі, намазхана, асхана сияқты қажетті нысандардың бәрі қарастырылған. Сағатына 450-500 жолаушы қабылдайтын әуежай ғимараты елімізде концессиялық тетікпен салынып жатқан алғашқы әуежайдың бірі. Ал әуежайдың бұрын ұшақтар қозғалысына тарлық етіп келген ұшу-қону жолағы табаны бетондалып, ұзындығы 3050 метрге, ені 60 метрге кеңейтілуде. Құрылыс жұмыстары толықтай аяқталған соң мұнда ?Боинг?, ИЛ-62, ИЛ-86 сынды бір мезгілде он төрт алып әуе кемесін қабылдауға мүмкіндік туады. Әуежайдан соң министр Қарақия ауданына аттанып кетті.