Құлсарыда есепте тұрған 4 мың науқасқа 19 млн теңгенің тегін дәрі-дәрмегі берілмеген

АТЫРАУ. KAZINFORM – Атырау облысындағы Құлсары қаласында есепте тұрған 4 мыңнан астам науқасқа 19 млн теңгенің тегін дәрі-дәрмегі берілмей келгені анықталды.

Жылыой аудандық прокуратурасы дәрігерлердің азаматтарға тегін медициналық көмектің кепілдік берілген көлемімен қамтамасыз ету міндеттерін елемеу фактілерін анықтады.

«Атап айтқанда, аудандық орталық ауруханада есепте тұрғандықтан тегін дәрі-дәрімек алатын науқастардың саны негізсіз қысқартылған. Дәрі-дәрмек жеткізушімен дәрілік заттар уақтылы жеткізілмеген. Аудандық прокуратураның қадағалау актісі бойынша аудандық орталық ауруханада қант диабеті, артериалдық гипертензия диагноздарымен есепте тұрған 4 мың 54 адамға 19 млн 155 мың 349 теңгенің 4 866 қаптама көлемінде дәрі-дәрмектері берілді. Оның ішінде Джардинс, Инвокана, Тражента, Форсига және тағы басқа дәрілер бар. Осылайша, аудандық прокуратура тұрғындардың конституциялық құқықтарын қалпына келтірді», -деп хабарлады Атырау облыстық прокуратурасынан. 

Анықталған дерекке байланысты Жылыой аудандық орталық ауруханасының жауапты лауазымды тұлғасы тәртіптік жауапкершілікке тартылды. 

Еске сала кетелік, бұдан бұрын Атырауда медицина мекемемелерінің директорлары ЖОО-да оқу үшін бюджеттің 10,5 млн теңгесін жұмсағанын жазған болатынбыз.