Құмар ойынға әуестенген жеті әскери қызметкер жұмыстан қуылды – министрлік өкілі

АСТАНА. KAZINFORM — Жыл басынан бері қарулы күштер қатарынан бәс тігіп, құмар ойынға қызыққан жеті әскери қызметкер қызметінен шеттетілді. Бұл туралы Қорғаныс министрлігі Әскери полиция бас басқармасының профилактика басқармасының бастығы Ертай Ералин мәлім етті. 

— Егер әскери қызметшілер анықталса, оларға қатысты шара қолданып, жұмыстан босатуға дейінгі жаза қарастырылған. Біз бұл тақырыпта тұрақты түрде профилактикалық іс-шаралар өткізіліп тұрамыз. Биыл лудоманияға байланысты суицид фактілері тіркелген жоқ. Менің білуімше, 7 әскери қызметші құмар ойындарға қатысқаны үшін қарулы күштер қатарынан босатылды, — деді Ертай Ералин Сенат қабырғасында өткен іс-шара барысында.

Оның айтуынша, әскери қызметшілерге қатысты заңнамалық шектеулер былтыр 9 қыркүйекте күшіне енді және құмар ойындарға әуес әскери қызметшілерді анықтау жұмыстары жалғасын табады.

Айта кетейік, бүгін Сенаттың Әлеуметтік-мәдени даму және ғылым комитетінің депутаттары ойын бизнесі және елімізде лотереяға қатысты қабылданған заңнамаға енгізілген өзгерістерді іске асыру барысын талқылады.

Бұған дейін хабарлағанымыздай елімізде құмар ойынға әуес мемлекеттік қызметкерлерді автоматты түрде анықтайтын арнайы жүйе әзірленіп жатыр. 

Бүгінде елімізде 350 мың адам құмар ойынды жүйелі түрде ойнайды.