Құрылысы бітпеген жылыжай: Алматының ботаникалық бағындағы өсімдіктер қыста үсіп қалмады ма
АЛМАТЫ. KAZINFORM — Ботаникалық бақ қызметкерлері үшінші қыс қатарынан жылыжайдағы сирек кездесетін көпжылдық өсімдікті сақтап қалу үшін өз қаражаттарын жұмсауға мәжбүр.
Ботаникалық бақ аумағындағы экспозициялық жылыжай 1969 жылы салынған. Нысанды қайта қалпына келтіру жұмыстары 2022 жылдың көктемінде басталып, бірақ сол жылдың соңында жауапсыз мердігер жұмысты аяқтамай тастап кеткен. Оранжерея ауданы — 1 025 шаршы метр. Мұнда сирек кездесетін тропикалық өсімдіктер өсіріледі.
Оранжереяда құрылыс басталғанға дейін коллекцияда 500-ден астам өсімдік түрі болған. Бірақ құрылыс жұмыстарының созылып кетуіне байланысты 103 тропикалық өсімдік қыста үсіп қалған.
Екі қыс қатарынан бақ қызметкерлерінің күшімен сирек кездесетін өсімдіктердің біразы аман сақталған. Бірақ былтыр күзде тропикалық және субтропикалық өсімдіктер зертханасының меңгерушісі Шолпан Масалимова үшінші қыс бұлай тұрса, өсімдіктер өліп қалуы мүмкін екенін айтқан еді.
Осы орайда, Kazinform тілшісі олардың қандай күйде екенін білу үшін ботаникалық бақтың баспасөз қызметіне жүгінді. Мекеме барлық сирек кездесетін өсімдіктер қыс мезгілінен аман шыққанын хабарлады. Қазіргі уақытта ботаникалық бақтың қорында өсімдіктердің 411 түрі бар.
Сонымен қатар мекеме жауабына сәйкес, жұмыс істеп тұрған өзге жылыжай кешенінде оранжерея коллекциясын көбейту бойынша жұмыс атқарылып жатыр.
Еске салайық, былтыр Алматының бас ботаникалық бағы күрделі жағдайға байланысты көмекке мұқтаж екенін ашық айтып, демеушілер іздеп жатқанын жариялады.
2020 жылы құрылысқа қатысты жобалық-сметалық құжаттама әзірленіп, мемлекеттік сараптамадан өткен. 2022 жылы конкурс қорытындысы бойынша «Строительная компания ШАХ» ЖШС-мен келісімшарттар жасалды, мердігер сол жылы жұмысын бастады, бірақ 2022 жылдың соңына қарай құрылыстың сметалық құнын көтеруді талап етіп, құрылыс жұмыстарын тоқтатты.
Осыған байланысты Ботаника және фитоинтродукция институты «Строительная компания ШАХ» ЖШС-ін мемлекеттік сатып алудың жосықсыз қатысушысы деп тану және құрылыс жұмыстарын аяқтап, нысанды пайдалануға беру жөніндегі міндеттемелерін орындауға мәжбүрлеу туралы талап қойып, сотқа арыз берді.
Бүгінгі күнге дейін Ботаника және фитоинтродукция институты барлық сот процестерін, соның ішінде апелляциялық сот инстанцияларында да жеңіп шықты. Соған қарамастан мердігер құрылыс жұмыстарын аяқтаған жоқ. 2024 жылдың 30 сәуірінде «Строительная компания ШАХ» ЖШС-мен келісімшарт мерзімі аяқталды.
