Кувейт киногерлері Өзбекстанда «Мәмлүктер тарихы» атты фильм түсірмек

ТАШКЕНТ. KAZINFORM - Ферғана облысы мен Қоқан қаласының әкімдігі кувейттік «Ebla International» компаниясының басшысы Хилал Арнаут бастаған делегацияны қабылдады, деп хабарлайды ӨзA. 

Тараптар 30 бөлімнен тұратын «Мәмлүктер тарихы» фильмінің кейбір бөлімдерін Қоқан қаласында түсіру мәселесін талқылады. Кездесуде Қоқанның туристік әлеуетін әлемге таныту және қаланың тарихи-мәдени байлығын көрсету мүмкіндіктері қарастырылды. Мұнда түсірілетін «Мәмлүктер тарихы» фильмінің бір бөлімі Қоқанның әсем сәулетін, көне ескерткіштері мен мәдени мұрасын әлем жұртшылығына таныстыру үшін тамаша алаң болады деп жоспарланған.

– Фильмнің Қоқанда түсірілуі қаланың әлемдік туристік картадағы орнын нығайтуға септігін тигізеді, – деді облыс әкімінің орынбасары Хуршиджон Ахмедов.

Өз кезегінде «Ebla International» компаниясының басшысы Хилал Арнаут өңірдің табиғатына назар аударды.

– Біз Ферғана облысы аумағындағы табиғат, таулар мен өзендердің тарихи ескерткіштерімен үйлесім тауып, мәмлүк дәуірінің ландшафттарын қалпына келтірудің қолайлылығын байқадық. Сонымен қатар экранда тартымды кейіпкер жасай алатын жергілікті актерлерді тартамыз, – деді Хилал Арнаут.

«Мәмлюктер тарихы» фильмінің түсірілімі осы жазда басталады.

Еске сала кетейік, ТМД-ның алғашқы халықаралық кинофестивалі Қазақстанда өтпек.