Қырық ешкі қораға «қайтып» келді - БҚО
ОРАЛ. ҚазАқпарат - Қазталов аудандық ішкі істер бөлімі Жалпақтал полиция бөлімінің сақшылары ұрланған қырық ешкіні тауып, иесіне қайтарды.
БҚО ІІД баспасөз қызметінен түскен мәліметке қарағанда, «шек-шек келгірлердің» қолды болғаны жөнінде полицияға шаруа қожалығының басшысы хабарлаған.
Жедел іздестіру шаралары барысында ұрылардың көршілес Жаңақала ауданы Мәстексай ауылынан келгені анықталды. Екі барымташы 1988 жылғы, оның біреуі ішкі істер органдарында есепте тұрады. Ұрлыққа ауызданып жүрген үшіншісі 21 жаста. Бұлардың бәрі де еш жерде жұмыс жасамайды, шамасы, ұрлықты кәсіп қылып жүрсе керек.
