Литвада ең әдемі ешкіні таңдаған байқау өткізілді

АСТАНА. ҚазАқпарат - Литваның Паневежский уезі Рамигала қаласында жыл сайын өтетін ешкілер арасындағы сұлулық байқауы ұйымдастырылды. Нәтижесінде Демит есімді 16 айлық ешкі ең көрікті деп танылды, деп хабарлады delfi.lt.

Қаланың дәстүрлі символы болып табылатын ең көрікті ешкі байқауына 500 адам жиылды.

Мереке бағдарламасында гүлдермен және өзге де түрлі әшекеймен безендірілген ешкілердің шеруі, оркестрдің өнер көрсетуі, би нөмірлері қарастырылған.

Жылдың ең көрікті ешкісі атанған жануардың иесі 74 жастағы зейнеткер, мамандығы бойынша ветеринарлық дәрігер Фердинандас Петкевичюс 6 рет байқауға қатысып, бірінші мәрте жеңіске жетті.

Рамигала қаласы үшін ешкілер үлкен маңызға ие. Бұл жануарлар XIII ғасырдағы қолжазбаларда жазылған ескі қалашықтың символы.  2010 жылы қала Литваның мәдени астанасы атанғанда, оның тұрғындары алғаш рет осы байқауды ұйымдастырған.

Сол кезден бастап ол жыл сайын өткізіледі.