Лондондағы Черчилль мүсініне шыққандар қылмыстық жауапкершілікке тартылады

АСТАНА. KAZINFORM — Британия үкіметі Парламент алаңындағы Уинстон Черчилль мүсінінің үстіне шығу қылмыс саналатынын мәлімдеді, деп хабарлайды BBC.

Дәл осындай қылмыс жасаған адам корольдіктің Екінші дүниежүзілік соғыстағы көшбасшысын қорлағаны үшін үш айға дейін түрмеге қамалуы және 1000 фунт стерлинг көлемінде айыппұл төлеуі мүмкін.

Черчилль мүсіні ресми түрде британдық соғыс кезіндегі ескерткіш ретінде жіктелмеген, бірақ Ішкі істер министрі Иветт Купер оны арнайы мемориалдар тізіміне қосу жоспарланып жатқанын айтты. Бұл ұсыныс қазір парламентте қаралып жатқан «Қылмыс және полиция қызметі» заң жобасында қамтылған. Премьер-министр Кир Стармер бұл бастаманы қолдады.

— Сэр Уинстон Черчилль еліміздің ең ұлы батырларының қатарында тұр. Ол әрбір премьер-министр үшін шабыт көзі саналады, — деді ол.

Еске сала кетейік, Ұлыбритания жүздеген мемлекеттік органды жабуды жоспарлап отыр.