Лондондағы ең ірі әуежай өрт салдарынан бір тәулікке жабылды
АСТАНА. KAZINFORM — Лондондағы «Хитроу» әуежайы жұма күні толық бір күнге жабылады. Әуежайды жабуға оны электр қуатымен қамтамасыз ететін қосалқы стансадағы өрт себеп болды. Өрттің неден шыққаны белгісіз, деп хабарлайды ВВС.
— Лондондағы «Хитроу» әуежайын электр қуатымен қамтамасыз ететін қосалқы стансадағы өртке байланысты әуежайда электр энергиясының айтарлықтай үзілуі байқалып отыр. Жолаушылар мен әуежай қызметкерлерінің қауіпсіздігін қамтамасыз ету мақсатында әуежай 21 наурыз күні сағат 23:59–ға дейін жабық болады. Жолаушыларға әуежайға барудан бас тартып, қосымша ақпарат алу үшін өздерінің әуе компанияларымен байланысу ұсынылады. Әуежай әкімшілігі келтірілген қолайсыздықтар үшін кешірім сұрайды, — делінген әуежайдың ресми сайтындағы хабарламада.
BBC мәліметінше, Лондон өрт қызметі жергілікті уақыт бойынша таңғы сағат 9:00–де Хейс қаласындағы қосалқы стансадағы өрттің «бақылауға алынғанын» хабарлады. Өртті сөндіруге 70-ке жуық өрт сөндіруші жұмылдырылған. Өрт қызметінің хабарлауынша, қосалқы стансадағы трансформатор жанған.
Осы жағдайға байланысты ондаған әуе компаниясы Лондонға бағытталған рейстерін тоқтатуға мәжбүр болды. Ұшуларын тоқтатқан компаниялардың қатарында британдық Virgin Atlantic және British Airways, ирландиялық Aer Lingus, америкалық United Airlines, үндістандық Air India және Гонконгтың Cathay Pacific әуе компаниялары бар.
Reuters агенттігінің бағалауы бойынша, бұл жағдайдан 60-тан астам әуе компаниясының 700-ге жуық рейсі зардап шекті.
«Хитроу» әуежайына ұшып шыққан рейстердің кейбірі бастапқы әуежайларына қайтарылды немесе басқа аэродромдарға бағытталды.
British Airways әуе компаниясы әуежайдың уақытша жабылуы әлем бойынша рейстер кестесінің айтарлықтай өзгеруіне әкелетінін мәлімдеді.
Ұлыбританияның энергетика министрі Эд Милибэнд National Grid электр желісі компаниясы электр энергиясын мүмкіндігінше тезірек қалпына келтіру үшін барлық шараларды қолданып жатқанын айтты. Оның айтуынша, өрттің нақты себебі әлі белгісіз.
— Бұл сұраққа жауап беру үшін әлі тым ерте. Өрттің неден шыққанын білмейміз. Бұл, сөзсіз, бұрын-соңды болмаған оқиға, — деді министр.
Әуежай өкілінің мәлімдемесіне сәйкес, өрт сөндіру топтары оқиға орнында жұмыс істеп жатыр.
— Электрмен жабдықтаудың толық қалпына келтірілетін уақыты әзірге белгісіз, — деді ол.
Хейс ауданындағы бұл өрт салдарынан Лондонның батысындағы мыңдаған үй жарықсыз қалды, ал 150-ге жуық адам эвакуацияланды.
Еске сала кетейік Астана халықаралық әуежайы жолаушыларға Жеңістің 80 жылдығына, сондай-ақ Отан қорғаушылар күніне орай өтетін әскери шеруге дайындық және оны өткізу кезінде ұшу кестесінде өзгерістер болуы мүмкін екенін хабарлаған еді.
