Мәдени-туристік іс-шараларды бренд ретінде қалыптастыру қажет - Ұлттық құрылтай
АСТАНА. KAZINFORM – Президент Қасым-Жомарт Тоқаев ел өңірлерінде өтетін мәдени-туристік іс-шараларды кеңінен дәріптеуді жүктеді.
- Туризм - аймақтардың дамуына серпін беретін сала болуға тиіс. Жергілікті жердегі республикалық және халықаралық іс-шаралар өңірлердің туристік әлеуетін арттыруға ықпал етеді. Биыл Таразда өтетін «Достастық жәрмеңкесі» осындай жобаның бірі болмақ. Жәрмеңкеге көптеген елдің қолөнершілері мен ауыл шаруашылығы мамандары шақырылды, - деді Қасым-Жомарт Тоқаев Бурабайда өтіп жатқан ұлттық құрылтайда.
Мемлекет басшысының мәлімдеуінше, аталған іс-шара серіктес елдермен экономикалық байланысымызды одан әрі күшейте түседі.
- Сонымен қатар ең көне сауда және мәдениет орталығының бірі – Тараз қаласының беделін арттыра түседі, облысқа жаңа инвестиция тартуға және туристердің көптеп келуіне септігін тигізеді. Жалпы әр аймақта жұртшылық асыға күтетін әрі дәстүрге айналған осындай маңызды мәдени-туристік іс-шаралар өтіп тұрады. Оны негізінен демеушілердің қаражаты есебінен ұйымдастырған жөн. Іс-шараларды жыл бойы жалғасатындай етіп біркелкі бөлу, бренд ретінде қалыптастырып, жарнамалау қажет. Әрбір оқиға бұқаралық ақпарат құралдары арқылы көрсетіліп, ел ішінде және шетелдерде жұрт назарына ілігуге тиіс. Мұның бәрі адамдардың аймақтарға қызығушылығын арттырып, туризмді дамытуға мүмкіндік береді, - дейді Президент.
Бұған дейін Қасым-Жомарт Тоқаев шекаралық елді мекендердің ахуалына тоқталған еді.
Сонымен қатар Мемлекет басшысы ұлттық құрылтайда қазақ халқын данышпан деп айтсақ, қателеспейміз деген болатын.
