Маған Олимпиада жүлдесін жеңіп алған Бейжің қаласы әрдайым ыстық - Қанат Ислам
БЕЙЖІҢ. KAZINFORM – Қытайдағы Қазақстанның туризм жылының ресми ашылу салтанатына өнер жұлдыздарымен қатар, спортта биік белестерді бағындырып жүрген саңлақтарымыз да арнайы келді.
Олардың қатарында белгілі жекпе-жек шебері Шавкат Рахмонов пен боксшы Қанат Ислам да бар. Осы орайда, Қанат Ислам Kazinform тілшісіне шағын сұхбат беріп, өзі Олимпиада жүлдегері атанған Бейжің қаласында аталып өткелі жатқан Қытайдағы Қазақстан туризмі жылының маңызына тоқталып өтті.
«Бұл екі елдің арасындағы үлкен жоба деп есептеймін. Осыдан-ақ, екі елдің президенттері қаншалықты жақын, тату-дос екенін байқауға болады. Біз Қытаймен тарихи көршілес жатқан елміз. Мен қазақ ұлы ретінде, Қазақстан азаматы ретінде екі елдің береке-бірлігініне зор құрметпен қараймын. Өз басым Қытайда туып, атажұртым Қазақстанға оралып, сонда тұрып жатқанымды мақтан тұтамын», - деді боксшы.
Сондай-ақ, ол екі елден де ешқандай таршылық көрмегенін жеткізді.
«Бар балалығым өткен Қытай елінен де, қазіргі қоныс тепкен атажұртымнан да ешқандай таршылық, жамандық көрген емеспін. Қазір де Қытайда туысқандарым тұрып жатыр. Өзімнің де бар балалығым осында өтті. Міне, осыдан тура 16 жыл бұрын Бейжің қаласында Олимпиада ойындарының жүлдегері атандым. Сондықтан Бейжің қаласы маған әрдайым ыстық», - деп атап өтті боксшы.
Айта кетейік, алдағы 28-29 наурыз күндері Бейжіңде Қытайдағы Қазақстан туризмі жылының ресми ашылу салтанаты өтеді. Осыған орай, Қазақстаннан Бейжіңге 600-ге жуық арнайы делегация ұшып келді.
