Магистратура бойынша мемлекеттік білім гранты иегерлерінің есімдері белгілі болды

АСТАНА. KAZINFORM – Магистратура бойынша 2025-2026 оқу жылына арналған білім гранттары иегерлерінің тізімі жарияланды. Бұл туралы Ғылым және жоғары білім министрлігі хабарлады. 

Білім беру гранттары кешенді тестілеу (КТ) нәтижелері бойынша конкурстық негізде тағайындалды.

Магистратура бойынша білім беру гранттарын тағайындау конкурсына ғылыми-педагогикалық бағыт бойынша 75 балдан, бейіндік бағыт бойынша 30 балдан жоғары жинаған оқуға түсушілер қатысты. Жалпы конкурсқа 20 мыңнан астам адам қатысты.

Болашақ магистранттардың ЖЖОКБҰ-на қабылдау 2025 жылдың 28 тамызына дейін (қоса алғанда) жүргізіледі. 

2025-2026 оқу жылына арналған білім беру гранттары иегерлерінің тізімі.

Айта кетелік магистратураға түсу үшін кешенді тестілеу кезінде 130 адамның нәтижесі жойылған еді.