Макрон қызметінен кеткен Франция премьеріне үкіметін сақтап қалу үшін екі күн уақыт берді

АСТАНА. KAZINFORM – Франция президенті Эмманюэль Макрон дүйсенбі күні премьер-министр отставкаға кеткеннен кейін Себастьен Лекорнюға әкімшілігін сақтап қалуға екі күн уақыт берді, деп хабарлайды Kazinform меншікті тілшісі.

Дүйсенбіде Лекорню өз үкіметінің құрамын атағаннан кейін бар болғаны 14 сағаттан кейін отставкаға кетті.

Оңшыл-центрист кабинеті Франция билігінде 1 ай ғана болып, мерзімі бойынша ең аз уақыт отырған үкімет болды және елді одан әрі саяси дағдарысқа тіреді.

Соған қарамастан Макрон Лекорнюмен кездесіп, оған елді тұрақтандыру жоспарын әзірлеу үшін сәрсенбі күні кешке дейін уақыт берді, деп хабарлады Елисей сарайы.

Лекорню бұл мәселе бойынша саяси күштермен соңғы келіссөз жүргізуге келіскенін және Макронға бұл туралы есеп беретінін мәлімдеді.

Президенттің ресми өкілінің айтуынша, Макрон сәтсіздікке ұшыраған жағдайда жауапкершілікті өз мойнына алуға дайын — бұл жаңа заң шығарушы органдарға жаңа сайлау өткізілуін тұспалдау болуы мүмкін.

Екі сауалнама мәліметтеріне сәйкес, әрбір төрт француз азаматының үшеуі (75%) Себастьен Лекорнюдің отставкаға кетуін мақұлдайды, ал сауалнамаға қатысқандардың жартысынан көбі Франциядағы соңғы саяси дағдарысқа президент Макрон жауапты деп санап отыр.

Францияның бұрынғы премьер-министрі және Макронның «Қайта өрлеу» партиясының бас хатшысы Габриэль Атталь француз теледидары эфирінде президентпен келіспейтінін ашық айтты.

«Ұлттық бірлестік» оңшыл партиясының жетекшісі Джордан Барделла X сайтындағы жазбасында «сайлауға қайта оралуға» шақырды.

Еске сала кетсек, 6 қазан күні таңертең Елисей сарайында Франция премьер-министрі Себастьен Лекорню отставкаға кету туралы өтініш берді.

Лекорню Францияның премьер-министрі болып 9 қыркүйекте ғана тағайындалды, ол небәрі 27 күн қызмет атқарған. Бұл оны ел тарихындағы ең қысқа мерзім жұмыс істеген премьер-министр етіп отыр.