Малайзия және Таиландтың сыртқы істер министрлері Мьянмаға барады
АСТАНА. KAZINFORM — Мохамад Хасан мен Марит Сангиампхонг гуманитарлық көмекті үйлестіру және құтқару операцияларына жәрдемдесу мақсатында сапарлайды. Бұл туралы ТАСС хабарлады.
Малайзияның сыртқы істер министрі Мохамад Хасан және Таиландтың сыртқы істер министрі Марит Сангиампхонг 5 сәуірде жер сілкінісінен зардап шеккен Мьянмаға гуманитарлық сапармен барады. Бұл туралы Оңтүстік-Шығыс Азия елдері қауымдастығының (АСЕАН) сыртқы істер министрлері қабылдаған мәлімдемеде айтылған.
Құжатқа сәйкес, сыртқы істер министрлері Мьянмаға гуманитарлық көмекті үйлестіру, құтқару операцияларына жәрдемдесу, сондай-ақ табиғи апаттармен күрес жөніндегі АСЕАН гуманитарлық көмек көрсету үйлестіру орталығымен өзара іс-қимылда жедел және тиімді гуманитарлық жауап беруді қамтамасыз ету мақсатында барады.
Bernama агенттігінің Малайзия СІМ-іне сілтеме жасай отырып хабарлауынша, бұл сапар Куала-Лумпурдың Мьянма халқымен ынтымақтастығын көрсетіп, гуманитарлық көмекті қажеттіліктерге сәйкес тиімді жеткізуге ықпал етеді.
30 наурызда АСЕАН-ға төрағалық ететін Малайзия Мьянма мен Таиландтағы жер сілкінісінің салдарына байланысты ұйымға мүше елдердің сыртқы істер министрлерінің жедел бейнеконференция форматындағы кездесуін шақырды. Қатысушылар зардап шеккен елдерге гуманитарлық көмек көрсету мақсатында тығыз ынтымақтасуға ниетті екенін білдірді. Бұған дейін Малайзияның СІМ елдің Мьянмаға гуманитарлық көмек көрсету және жер сілкінісінің салдарын жою жөніндегі 50 адамнан тұратын арнайы топ жіберетінін хабарлаған болатын.
Айта кетелік Мьянмадағы жер сілкінісінен мерт болғандар саны 1700-ге жетті.
