Маңғыстауда афроамерикалық бүлдіршін мемлекеттік рәміздермен танысты
АҚТАУ. KAZINFORM - Мемлекеттік рәміздер күні Теңге ауылындағы «Айболат» балабақшасында мерекелік шара өтті.
Бүлдіршіндерге мемлекеттік рәміздерді таныстырып, ұлттық нышандарға сүйіспеншілігін арттыру мақсатында ұйымдастырылған шарада Адай есімді афромерикалық бүлдіршіннің патриоттық сезімін ерекше атап өтуге болады.
Ол басқа балалармен бірге әнұранды бар ынтасымен шырқап, Мемлекеттік Тумен танысты.
Айта кетейік, 2021 жылы әлемді коронавирус індеті шарпыған уақытта Жаңаөзен қаласындағы перзентханада афроамерикалық сәби дүниеге келген болатын. Оған «Адай» деп ат қойылды.
Ол туралы Kazinform «Қазақтың салтымен тәрбиеленіп жатқан Адай Қазақстанның азаматтығын алғысы келеді», деген тақырыпта материал жариялаған еді.
Бүгінде 3 жасар Адай Теңге ауылындағы «Айболат» балабақшасының кіші тобында тәрбиеленуде. Әкесі Фрайдэй Адере мен анасы Мерси Адере тіл үйрену курстарында ағылшын тілінен сабақ береді.
