Маңғыстаудың Бейнеу ауданында 11 бала бірдей диагнозбен ауруханаға жеткізілді

АҚТАУ. KAZINFORM — Оқиға кешкі мезгілде сағат 19:05 — 23:00 аралығында болған. Бейнеу аудандық орталық ауруханасының қабылдау бөліміне 9-12 жас аралығындағы 11 бала жедел-жәрдеммен жеткізілген. Олардың барлығында құсу мен әлсіздік болған. 

Бейнеу ауданы әкімі баспасөз қызметінің хабарлауынша, балалар 2,3 және 5-сынып оқушылары. Барлығы да дәрігерлердің тексеруінен кейін үйлеріне жіберілген.

— Дәрігерлер қарап, балаларды үйлеріне қайтарды. Ауруханаға жатқызылғандар жоқ. Қазіргі уақытта оқушылардың денсаулығы бірқалыпты, амбулаторлық бақылауда, — делінген хабарламада. 

Ал, Бейнеу аудандық санитариялық — эпидемиологиялық бақылау басқармасының мамандары осы оқиғадан кейін, жедел тергеп-тексеру жүргізіп, азық-түліктерден сынамалар алған. Оқушылардың неден ауырғанын анықтау үшін, санитариялық профилактикалық іс-шаралар жүргізіліп жатыр.

Бұған дейін, Маңғыстауда Қызылсай ауылында балабақшада балалар астан уланған еді.