Маңғыстауда білім саласында 800-ден астам адам жауапкершілікке тартылды

АҚТАУ. KAZINFORM – Аймақта прокурорлар білім беру саласына толық тексеру жүргізген. Нәтижесінде көптеген заңбұзушылық пен білім сапасын төмендетуге әсер ететін факторлар анықталды.

Маңғыстау облыстық прокуратурасының басқарма бастығы Мерген Меңдігалиевтің мәліметінше, бюджет қаржысын жымқыру, алаяқтық, қызметтік өкілеттілікті теріс пайдалану деректерімен 20-дан астам қылмыстық іс қозғалған.

- Тексеру нәтижесінде 300-ден астам тұлға тәртіптік жазаға, 500-ден астам лауазымды тұлға әкімшілік жауаптылыққа тартылды. Сондай-ақ, 7 педагогтың жалған дипломмен жұмыс істеп жүргенін анықтадық. Жалпы соңғы 3 жылда облыста жалған дипломға қатысты 100-ден астам дерек тіркелді. Барлығы бойынша қылмыстық іс қозғалып, кінәлі тұлғалар жауапқа тартылды, - дейді Мерген Меңдігалиев.

Прокурорлар бұдан былай жалған дипломды жұмысқа кірмес бұрын анықтау үшін құзырлы мемлекеттік органға орталықтандырылған жүйе құруды ұсынған.

- Жалған дипломды пайдалану фактісі арқылы балаларға білім беру ең өткір мәселе болып тұр. Сондықтан педагогтың дипломы жұмысқа орналасқанға дейін орталықтандырылған жүйе арқылы тексерілуі қажет. Қазір уәкілетті орган сол жүйені қарастырып жатыр. Алдағы уақытта іске қосады, - дейді Маңғыстау облыстық прокуратурасының басқарма бастығы Мерген Меңдігалиев.

Бұған дейін синоптиктер Маңғыстауда жазда аптап ыстық болатынын хабарлаған еді.