Маңғыстауда екі жеткіншектен эхинококкоз ауруы анықталды
АҚТАУ. KAZINFORM – Жыл басынан бері облыста эхинококкоздың жеті жағдайы тіркелді. Науқастардың екеуі – бала. Бұл туралы өңірдің бас мемлекеттік санитарлық дәрігері Гүлнар Үркінбаева мәлімдеді. Былтыр осы кезеңмен салыстырғанда, биыл аурудың көрсеткіші 9 жағдайға төмендеген.
«2023 жылы 16 адам ауырды. Биыл төмендеу бар. Жаңаөзен қаласы мен Түпқараған ауданында 14 жасқа дейінгі екі бала ауырып қалды. Мұнайлы қаласында ең көп көрсеткіш 4 науқас анықталды», - деді өңірлік санитарлық-эпидемиологиялық бақылау департаментінің басшысы Гүлнар Үркінбаева.
Эхинококкоз ауруы ішкі органдардың зақымдануы яғни, эхинококк кисталарының пайда болуы. Ол көбінесе жануарлардан, әсіресе иттер мен мысықтардан жұғады.
Эхинококкоздың алғашқы белгілері – әлсіздік, бас ауруы. Теріде қызыл дақтар түрінде ұсақ бөртпелер пайда болып, дене температурасы жоғарылайды.
