Маңғыстауда жыл басынан бері 18 мыңға жуық нәресте дүниеге келді
Маңғыстау облысында жыл басынан бері 17 389 нәресте жарық дүние есігін ашты. Соның ішінде облыстық «Ана мен бала» орталығында 7 543 бала дүниеге келді, бұл көрсеткіш облыс бойынша 42,8%-ды құрайды, деп хабарлайды Kazinform.
2023 жылдың 10 айында Маңғыстау облысы бойынша аналардың физиологиялық, асқынусыз босану көрсеткіші 18%-ды құрайды. Ал, облыс бойынша 2023 жылдың 10 айында тіркелген критикалық жағдайларда болған аналар саны — 77. Жыл басынан бері Маңғыстау облысы бойынша 177 егіз, 3 үшем дүние есігін ашты.
Орталықта мерзімінен бұрын туған нәрестелер саны — 1 763. Оның ішінде дене салмағы 1 келіге дейін — 55 нәресте, 1.5 келіге дейін –65 нәресте дүниеге келді.
— Жалпы былтырмен салыстырғанда бала саны өскен. Өзге өңірлермен салыстырғанда Маңғыстау облысы алдыңғы қатарда келе жатыр. Бірақ, денсаулығы төмен науқас балалар да дүниеге келді. Тірі туғандардың ішінен 229 (қатаң есептегі - 53) бала туа біткен немесе көптеген ақауы бар және 15 бала хромосомалық аурумен дүниеге келді, — деді Маңғыстау облыстық «Ана мен бала» перинаталдық орталығының директоры Жапырақ Епенова.
