Маңғыстау тұрғынынан 200-дей киік мүйізі табылды
АҚТАУ. ҚазАқпарат – Маңғыстау облысы Бейнеу ауданында 198 дана киік мүйізін сақтаған тұрғын ұсталды, деп хабарлайды ҚазАқпарат тілшісі.
41 жастағы ер адам мүйіздерді Бейнеу ауданы Ақжігіт ауылында өз үйінің қорасында сақтаған.
«18 тамызда Бейнеу аудандық полиция қызметкерлерімен бірге жоспарға сай «Киік» жедел профилактикалық іс-шарасын өткізу кезінде бейнеулік тұрғыннан 2 қапқа салынған 198 дана киік мүйізі табылды. Ол мүйіздерді сатып алғанын айтып отыр», - деді «Қызылсай» мемлекеттік өңірлік табиғи паркінің директоры Мыңберген Қаратауов.
Аталған факт тіркеліп, қылмыстық іс қозғалған.
