Марин Ле Пен төрт жылға бас бостандығынан айыру жазасына кесілді
АСТАНА.KAZINFORM - Француз соты «Ұлттық бірігу» партиясының жетекшісі Марин Ле Пэнді Еуропалық Одақ қаражатын жымқыруда кінәлі деп тапты, деп хабарлайды BBC.
Француздық сот Марин Ле Пэнге бес жыл бойы мемлекеттік органдарға сайлауға қатысуға тыйым салды, яғни ол 2027 жылғы Франция президенті сайлауына қатыса алмайды, онда ол жеңіске жетудің ықтимал кандидаттарының бірі деп саналатын. Сонымен қатар, сот Ле Пэнді төрт жылға бас бостандығынан айыру жазасына кесіп, оның екі жылы нақты түрмеде өтетін болса, қалған екі жылы шартты болады деп шешті. Түрмеде отырған уақыт электронды білезік тағуға ауыстырылуы мүмкін. Сондай-ақ, саясаткер 100 мың еуро айыппұл төлеуге міндеттелді.
Ле Пэн сот шешімін жариялаудан бұрын залдан шығып кетті.
Әдетте, Францияда жазалар апелляциялық процесс аяқталғанша орындалмайды, бірақ судьялар жазаны дереу орындауға шешім қабылдай алады. Бұл шешім тек сайлауға қатысуға тыйым салуға қатысты қолданылды.
Ле Пен сот шешіміне шағымданады деп күтілуде, ол қаралғанға дейін бас бостандығынан айыру туралы ереже күшіне енген жоқ.
«Ұлттық бірігу» партиясында резервтік кандидат бар — 2022 жылдан бастап партияның ресми жетекшісі болған 29 жастағы Жордан Барделла, ол премьер-министр лауазымына да үміткер болды.
- Бүгін тек Марин Ле Пэн емес, француз демократиясы да әділетсіз жазаланды, — деп жазды ол сот шешімі туралы хабардар болғаннан кейін.
Айыптау нұсқасы бойынша, 2004 жылдан 2016 жылға дейін Ле Пэн және оның партиясының басқа жетекшілері Европарламент депутаттарына тиесілі болуы тиіс көмекшілерді жалған түрде жалдаған. Бұл көмекшілер Европарламентте сирек кездесіп, ұлттық деңгейде партия қызметкері ретінде жұмыс істеген. Прокурорлар олар Еуроодақ қазынасынан шамамен 3 миллион еуро ұрлаған деп есептейді.
Тергеу 2016 жылдың соңында басталды, өйткені Францияның Әділет министрлігіне Ле Пэннің 2004-2017 жылдар аралығында Еуропарламент депутаты болған кезде оның көмекшілері туралы анонимді есеп келіп түскен.
Сот процесі қыркүйек айында басталды. Айыптау Ле Пэнге бес жылдық түрмеге қамау жазасын талап еткен, оның ішінде үш жылы шартты, 300 мың еуро айыппұл және бес жылдық сайлауға қатысуға тыйым салу ұсынылған.
Прокурор сайлауға қатысуға тыйым салу шешімінің дереу күшіне енуі тиіс екенін мәлімдеді — бұл шешім апелляцияға дейін орындалуы тиіс. Осы күндері Францияның Конституциялық соты саяси қызметке қатысуға тыйым салудың дереу күшіне енуін заңды деп таныды.
Айта кетелік Франция соты француздық оппозиция жетекшісі мен сегіз Еуропарламент депутатын кінәлі деп тапты.
