Марокко – Африкада күн энергетикасын дамыту саласында көш бастады

АСТАНА. KAZINFORM — Африкада күн энергетикасы қарқынды дамып келеді, бұл үдеріс Қытайдан күн панельдерінің жаппай импортталуымен байланысты. Осы серпінді дамудың ортасында Марокко ерекше көзге түседі: ол құрлықтағы негізгі импорттаушылардың бірі ғана емес, сонымен қатар жергілікті өнеркәсіп дамуының көшбасшысы болып отыр, деп жазды AZƏRTAC.

AZƏRTAC марокколық БАҚ-қа сілтеме жасай отырып хабарлағандай, Ember зерттеу тобының соңғы есебіне сәйкес, Марокко энергетикалық көшу саласында өңір бойынша жетекші орынға ие. Жақында ғана корольдік өзінің өндірістік қуаттылығын жылына 1 гигаваттқа дейін екі есеге арттырды, бұл елдің өнеркәсіптік дамуындағы айтарлықтай ілгерілеуді көрсетеді.

«Африкадағы күн энергетикасының қарқынды дамуының алғашқы белгілері» атты есепте 2024 жылдың шілдесінен 2025 жылдың маусымына дейін Қытайдан 15 032 мегаватт күн панелі импортталғаны айтылады. Бұл — өткен жылмен салыстырғанда 60%-ға көп.

Сонымен қатар, Ember деректеріне сәйкес, Марокко — өз күн панельдерін өндіруді дамытқан санаулы африкалық елдердің бірі. Жылына 1 гигаваттқа дейін өндірістік қуатты екі еселеуге мүмкіндік берген бұл стратегия жеткізу тізбегін қамтамасыз ету мен импортқа тәуелділікті азайтуға бағытталған.

Күн энергетикасын дамыту — жаһандық энергетикалық стратегияның бір бөлігі. Марокко 2030 жылға қарай жаңартылатын энергия көздерінің үлесін орнатылған жалпы қуаттың 52%-ына дейін арттыруды мақсат етіп отыр. 2023 жылдың өзінде бұл көздер елдің ұлттық электр энергетикалық теңгерімінің шамамен 40%-ын құрады.

Еске сала кетейік, бұған дейін Африка тұрғындары еуропалықтардан екі есе көп садақа беретінін жазған едік.