Марокко королі Құрбан айтта қой союды тоқтатуға шақырды

АСТАНА. KAZINFORM – Марокко королі VI Мұхаммед қуаңшылықтан кейін елде малдың азаюына байланысты марокколықтарды биылғы Құрбан айтта қой шалу рәсімінен бас тартуға шақырды, деп хабарлайды CNN. 

Ресми деректерге сәйкес, Мароккода 2025 жылға қарай ірі қара мен қой саны үздіксіз құрғақшылық салдарынан тоғыз жыл бұрынғы соңғы санақпен салыстырғанда 38 пайызға қысқарды.

— Біздің осы діни рәсімді ең жақсы жағдайда орындауға деген ұмтылысымыз мал басының айтарлықтай қысқаруына әкелген еліміздің алдында тұрған климаттық және экономикалық қиындықтарды ескеру жауапкершілігімен бірге жүреді, - делінген корольдің хатында. Оны Al Oula мемлекеттік телеарнасында Дін істері жөніндегі министр Ахмед Таофик оқыды.

Марокконың жоғарғы діни жетекшісі король «осындай қиын жағдайда құрбандық шалу халқымыздың үлкен бөлігіне, әсіресе табысы шектеулі адамдарға айтарлықтай зиян тигізетінін» атап өтті. 

Биыл жауын-шашын 30 жылдық орташа деңгейден 53%-ға төмен болды, соның салдарынан малға жайылым жетіспеді. Ет өндірісі қысқарды, бұл ішкі нарықта бағалардың көтерілуіне және ірі қара, қой және қызыл ет импортының артуына әкелді.

— Жақында ел Аустралиядан 100 мыңға дейін қой әкелу туралы келісімге қол қойды, - деп жазды CNN.

Марокко өзінің 2025 жылғы бюджетінде ішкі нарықтағы бағаларды тұрақтандыру үшін ірі қара мал, қой, түйе және қызыл етке импорттық баж салығын және қосылған құн салығын тоқтатты.

Еске сала кетсек, Қазақстан мұсылмандары діни басқармасының шариғат және пәтуа бөлімі 2025 жылғы діни күндер кестесін бекітті.