Маск жақын болашақта Марста тәуелсіз өркениет құруды жоспарлап отыр

АСТАНА. KAZINFORM — SpaceX 20-30 жылдан кейін Жердің ешқандай қолдауынсыз Марста өркениет құруды жоспарлап отыр. Бұл туралы компания басшысы Илон Маск Fox News арнасына берген сұхбатында мәлімдеді.

— Біз Марсқа барғысы келетіндердің барлығын жіберіп, ол жерде өзін-өзі толық қамтамасыз ететін өркениет құрғымыз келеді. Бұл компанияның ұзақ мерзімді мақсаты — өмірді бірнеше планетаға тарату. Менің ойымша, біз мұны 20-30 жылда жасай аламыз, — деді Маск.

15 наурызда Маск 2026 жылдың соңында Starship ғарыш кемесі Optimus гуманоид роботымен Марсқа ұшырылатынын хабарлады. Оның айтуынша, роботтық ұшулар сәтті жүзеге асса, 2029 жылы Марсқа адамдарды жібере бастайды.

Айта кетейік, Маск «ең ақылды жасанды интеллектіні» іске қосатынын жазған едік.