Мәжіліс депутаттары 2014 жылдың 1 қаңтарына дейін сатып алынған көлікке салықты арттырмауды ұсынады - Фракция отырысы

АСТАНА. 4 қазан. ҚазАқпарат - Мәжіліс депутаттары 2014 жылдың 1 қаңтарына дейін сатып алынған көлікке салықты арттырмауды ұсынады. Бұл туралы бүгін Мәжілісте «ҚР кейбір заңнамалық актілеріне өзгерістер мен толықтырулар енгізу туралы» заң жобасын талқылауға арналған «Нұр Отан» ХДП парламенттік фракциясының отырысында мәлім болды.

«Заң жобасында қарастырылған қозғалтқышы 3 мыңнан 4 мың текше сантиметрге дейінгі көлік құралдарына салық мөлшерлемесін көтеру мәселесін қолдай отырып, өз ұсыныстарымызды да алға тартамыз. Атап айтқанда, қозғалтқыш көлемі 4 мыңнан 5 мың текше сантиметрге дейінгі көлік құралдарына салық мөлшері 130 айлық есептік көрсеткішке дейін белгіленуі керек, ал қозғалтқыш көлемі 5 мың текше сантиметрден асатын көлік үшін салық 200 айлық есептік көрсеткішке тең болуы қажет. Сонымен қатар, еліміздің қарапайым азаматтарының мүдделерін кемсітпеу үшін қарастырылып отырған барлық салықтық ставкаларды 2014 жылдың 1 қаңтарынан бастап алынған автокөліктерге салуды ұсынамыз. Яғни, осы уақытқа дейін иеленген автокөліктерге ескі салық мөлшерлемесі сақталуы керек», - деді Мәжіліс төрағасы, фракция жетекшісі Нұрлан Нығматулин.

Сонымен қатар, палата төрағасы жылжымайтын мүлікке қатысты коэффицент көтеретін салықты алып тастауды, салықты негізінен тұрғын үй құнына қарай есептеуді ұсынды.