Мәжіліс Кеден одағы аумағында қылмыстық жолмен алынған кірістерді заңдастыруға қарсы шартты мақұлдады
АСТАНА. 19 қыркүйек. ҚазАқпарат -Бүгін Парламент Мәжілісінде өткен жалпы отырыста палата депутаттары «Кеден одағының кедендік шекарасы арқылы қолма-қол ақша қаражатын және (немесе) ақша құралдарын өткізу кезінде қылмыстық жолмен алынған кірістерді заңдастыруға (жылыстатуға) және терроризмді қаржыландыруға қарсы іс-қимыл туралы шартты ратификациялау туралы» заң жобасын мақұлдады.
2011 жылдың 19 желтоқсанында Мәскеу қаласында жасалған шартқа сәйкес, тараптардың құқық қорғау және уәкілетті органдарымен өзара іс-қимыл жасауда Кеден одағының кедендік шекарасы арқылы қолма-қол ақша қаражатын өткізу кезінде қылмыс арқылы алынған кірістерді заңдастыруға қарсы шараларды көзделеді.
«Шартта кеден органдары қолма-қол ақша қаражатын өткізу кезінде кеден қызметкерлеріне осы мәселені бақылауды жүзеге асыру міндеті жүктеледі. Бұл ретте құқық қорғау органдарынан, қаржы-мониторинг органдарынан тиісті ақпарат алған кезде қызметкерлер ондай қаражаттың өтуін тоқтата тұруға байланысты өкілеттікке ие болады. Тоқтатылған ақша қаражаты тиісті тараптың кеден органдарында жүзеге асады», - дейді Қаржы министр Болат Жәмішев.
Заң жобасында тараптардың бірлескен өзара іс-қимыл тәртіптері, ақпарат алмасулар жайы қамтылған.
