Мәжіліс депутаты мектепке жұмысқа тұру үшін сыйақы беру мәселесін көтерді
АСТАНА. KAZINFORM — Мәжіліс депутаты Темір Қырықбаев елімізде білім беру сапасын арттыруға бағытталған ауқымды реформалар жүзеге асырылғанымен, мектеп жүйесінде бірқатар шешімін таппаған мәселенің барын айтты.
— Сыбайлас жемқорлыққа қарсы іс-қимыл агенттігінің мәліметі бойынша 2023 жылдың басынан бері білім беру саласында 303 қылмыстық іс тіркеліп, жалпы шығын 17,5 млрд теңгені құраған. Көп қаржы жымқыру фактісі Жетісу, Түркістан, Қызылорда, Алматы облысында және Алматы қаласында анықталды. Бұл аймақтарда қаржылық бақылаудың әлсіздігі байқалады, — деді Темір Қырықбаев Премьер-Министрдің орынбасары Ермек Көшербаевтың атына депутаттық сауал жолдай отырып.
Халық қалаулысы келтірген дерекке сүйенсек, білім саласында қаржы жымқыру фактісі бойынша 249 адам жауапкершілікке тартылған. Олардың арасында 10 білім бөлімінің басшысы, 2 колледж директоры, 28 мектеп директоры, 21 балабақша басшысы және 136 есепші бар.
— Педагогикалық кадрды іріктеудің жаңа ережесі енгізілгеніне қарамастан, бұрынғы заңсыздықтарды айналып өту және жемқорлық тәуекелін тудыру мүмкіндігі сақталуда. Халық арасында мектепке жұмысқа орналасу үшін директорға немесе басқарма қызметкеріне «заңсыз сыйақы» беру қажет деген қауесет желдей есіп жүр. Өйткені, оңтүстік өңірде жұмыссыздық статистикада көрсетілгеннен әлде қайда жоғары. Ауылдық жерлерде мектеп, балабақша, клуб үйінен басқа жұмыс көзі тапшы. Сондықтан мұғалім болуға талпынатындар тым көп. Тіпті, борант немесе техникалық қызметкер болу үшін де заңсыз ақша беру жағдайлары кездеседі. Сонымен қатар, қызметкерлердің жұмыстан шықпау үшін жалақысының бір бөлігін беру фактілері туралы да айтылуда, — дейді ол.
Осы орайда Мәжіліс депутаты Үкіметке келесі шараларды қабылдауды ұсынды:
1) «Электрондық мектеп» сынды электрондық жүйелерді енгізіп, білім беру саласындағы кадрларды басқарудың бірыңғай электрондық базасын құруды тездету;
2) Жұмысқа орналасу процесінің ашықтығын қамтамасыз етіп, педагогикалық кадрларды іріктеудің ашық және әділ жүйесін қамтамасыз ету;
3) Қоғамдық бақылауды күшейту маңызды. Ата-аналар комитеті және басқа қоғамдық ұйымдардың білім беру процесіне және қаржылық қызметке қатысуын кеңейту.
Еске сала кетсек, Антикордың мәліметі бойынша өткен жылы білім саласында жемқорлыққа қатысты 302 қылмыстық іс тіркелді.
