Медсақтандыру қорына республикалық бюджеттен 1,3 трлн теңге бөлінген
АСТАНА. KAZINFORM – Қаржы министрі Мәди Такиев Үкімет отырысында республикалық бюджеттің қалай жұмсалып жатқанын баяндады.
«Республикалық бюджеттің шығыс бөлігі 16,7 трлн теңге болды. Атап өту керек, мұнда әлеуметтік бағыттың басымдығы сақталып қалды. Мемлекет негізгі әлеуметтік міндеттемелерді орындады.
Мәселен, зейнетақы мен жәрдемақыға 4 трлн теңге, өңірлер сұратқан субвенцияларға 4 трлн теңге, міндетті медициналық сақтандыру қорына 1,3 трлн теңге бағытталды», — деді ведомство басшысы.
Ал әкімдіктердің бюджетінде шығыстар көлемі 10,1 трлн теңге болған. Оның ішінде әлеуметтік салаға 5 трлн 182 млрд теңге жұмсалған. Бұл жалпы шығыстардың 51,2%-ы деген сөз.
«Сонымен қатар, тұрғын үй-коммуналдық шаруашылығына 1 трлн 380 млрд теңге, ауыл шаруашылығына 602 млрд теңге, көлік және коммуникация саласына 918 млрд теңге жұмсалған», - деді Қаржы министрі.
