Мектептердегі «111» QR-кодына күн сайын 600 шағым түседі

АСТАНА. KAZINFORM – Мектептерге орнатылған «111» QR-кодына күн сайын 600 шағым түседі. Бұл туралы Бала құқықтары жөніндегі уәкіл Динара Зәкиева Мәжілістің жалпы отырысынан кейін БАҚ өкілдерінің сұрағына берген жауабында айтты.

-«111» мемлекеттік байланыс орталығы бар. Ол Президенті тапсырмасы бойынша былтыр қазан айында ашылғанын білесіздер. Оның функциясы заңмен бекітілген. Желтоқсан айынан бастап бүкіл мектептерге «111» QR-коды орнатылды. Қазір күн сайын балалар өздерін алаңдататын мәселе туралы, зорлық-зомбылыққа тап келгендерін, психикалық-эмоционалдық жай күйі туралы 600-ге дейін SMS-хат жолдайды. Осы хабарлар негізінде «111» орталығы полиция департаменттерімен байланысады. Осы хабарлар арқылы қылмыстар анықталып жатыр, - деді Динара Зәкиева. 

Бұл QR-құрал арқылы қоңырау шалу міндетті емес, хабарлама жазса да жетіп жатыр. 

- Қазір балалар бұл құралды өте белсенді пайдаланып жүр. Олар үшін өз қиындығын қоңырау шалып айтқаннан хабарлама арқылы жеткізу оңай болып шықты. Бұрын жыл сайын 1000-ға жуық қоңырау түссе, қазір күн сайын 600 SMS келеді. Басында тіпті күніне 1000 хабарлама келетін. Өткен айда 11 мыңға жуық SMS-хабарлама келсе, буллинг, зорлық-зомбылық, суицидтік, писхикалық-эмоционалдық жағдай санаты бойынша ғана 400 жағдайда көмек көрсету керектігі расталды. Хабарламалар арқылы келетін шағымдардың санаты өте көп. Денсаулық сақтау мәселесі бойынша да, сабаққа көмек сұрап та хабарласып жатады. Мұның бәрі орталыққа деген сенім деңгейін көрсетеді, - деді Д.Зәкиева. 

Бұған дейін ол оқушылар арасындағы қатыгездік оқиғаларына қатысты пікір білдірген еді.