Мемлекетке 32 млн. астам теңге салық төлеуден жалтарған кәсіпкер сотталды
ОРАЛ. Қаңтардың 26-сы. ҚазАқпарат /Ғайсағали Ералы/ - Салық декларацияларына кіріс-шығыс туралы бұрмаланған мәліметтер енгізу арқылы мемлекетке 32 527 393 теңге төлеуден жалтарған «Динас» ЖШС директоры Н.Голованова Орал қалалық сотының үкімімен 1 жылға бас бостандығынан айрылып, жазасын жалпы тәртіптегі түзету колониясында өтейтін болды.
Облыстық экономикалық қылмысқа және сыбайлас жемқорлыққа қарсы күрес департаментінің баспасөз қызметінен ҚазАқпарат тілшісіне хабарлағанындай, Н.Голованова сондай-ақ екі жылға кәсіпкерлік қызметімен айналысу құқығынан айрылып, оған 200 АЕК немесе 233 600 теңге көлемінде айыппұл салынды. Сондай-ақ одан 32 527 393 теңге өндіріліп алынды.
