Мемлекетке қайтарылып жатқан ҚБТУ студенттерінің тағдыры не болады — министр жауабы

АСТАНА. KAZINFORM — Ғылым және жоғары білім министрі Саясат Нұрбек Үкімет отырысынан кейін өткен баспасөз мәслихатында мемлекетке қайтарылып жатқан Қазақстан-Британ техникалық университетінің келешегі туралы пікір білдірді.

— ҚБТУ-ды мемлекетке қайтару процесі жүріп жатқанын білеміз. Құрылтайшысы ауысса, оқытушы-профессорлық құрамы, олардың айлығы қазіргі деңгейде сақтала ма? Қазіргі студенттері дипломын ешқандай кедергісіз алып шыға ма?, — деп сұрады журналист.

Саясат Нұрбек сот шешімі шыққанша қандай да бір толыққанды мәлімет беру қиын екенін ескертті.

— Қазір ол университет жабылады екен, басқалай болады екен деп айтуға болмайды. ҚБТУ иесі ауысса, толыққанды өзгереді деген әңгіме жоқ. Университеттің басшылығымен тікелей байланыстамыз. Жұмыс жалғасып жатыр, дәрістер жүріп жатыр. Ешқандай бөгет жоқ. Енді соттың шешімін күтуіміз керек. Қазіргі таңда толыққанды комментарий бере алмаймын. Соттың нақты шешімі шықсын. Сізге нақты айтайын, бұл университет бізге беріле ме, әлде басқа шешім бола, әлі шешілген жоқ. Сот шешімі шыққаннан кейін толыққанды комментарий беруге дайынбыз, — деді министр.

Еске салсақ, өткен аптада Қазақстан-Британ техникалық университеті мемлекетке қайтарылғаны мәлім болған еді.