Меморгандар ақпараттық жүйелерді бақылау сервисіне қосуды аяқтауы тиіс - Бектенов
АСТАНА. KAZINFORM – ҚР Премьер-министрі Олжас Бектенов Мемлекеттік органдарға осы жылдың соңына дейін барлық ақпараттық жүйелерді дербес деректерге қолжетімділікті бақылау сервисіне қосуды аяқтауды тапсырды.
— Ақпараттық жүйелердің істен шығу фактілері орын болып жатыр. Мұндай жағдайлар электрондық үкімет пен халыққа қызмет көрсету орталықтарының жұмысын уақытша шектеуге әкеп соғады. Осыған байланысты серверлік жабдықтар мен бағдарламалық қамтамасыз ету жүйесін жетілдіру бағытында қосымша шаралар қабылдауды тапсырамын. Egov инфрақұрылымы 24/7 режимінде мінсіз жұмыс істеуге тиіс. Көрсетілетін онлайн қызметтерді одан әрі арттыру үшін жоғары жылдамдықты интернеттің жаппай қолжетімді болуын қамтамасыз еткен жөн. Бұл тұрғылықты жеріне қарамастан барлық азаматтардың электрондық мемлекеттік қызметті толық алуына мүмкіндік береді. Мемлекеттік қызметті онлайн форматқа көшіре отырып мемлекеттік бюджет шығындарын оңтайландыру қажет, - деді ол.
Сондай-ақ Олжас Бектенов мемлекеттік органдарға цифрлық қауіпсіздікті қамтамасыз ету туралы тапсырма берді.
— Дербес деректерді қорғау мен цифрлық қауіпсіздікке баса назар аударған жөн. Мемлекеттік қызмет көрсету процесінде орталықтандырылған мониторингтің болмауы деректердің таралып кету қаупін арттырып, интернет алаяқтығының көбеюіне әкеліп соғады. Мемлекеттік органдарға осы жылдың соңына дейін барлық ақпараттық жүйелерді дербес деректерге қолжетімділікті бақылау сервисіне қосуды аяқтауды тапсырамын, - деді Үкімет басшысы.
Осыған дейін Жаслан Мәдиев eGov порталын жаңғырту жұмыстары қалай жүретінін айтып берген еді.
