Меркель Бундестагта Мерцтің канцлер болып сайлануына қатыспақ

АСТАНА. KAZINFORM –  Германияның бұрынғы канцлері Ангела Меркель (2005–2021 жж. қызмет атқарған) 2025 жылғы 6 мамырда Федералдық канцлерді сайлау кезінде Бундестаг отырысына құрметті қонақ ретінде қатысады, деп хабарлайды ТАСС.

Бұл туралы RND редакциялық бірлестігі Меркель кеңсесінің өкіліне сілтеме жасап хабарлады.

— Мен Германияның бұрынғы канцлері Меркельдің 2025 жылғы 6 мамырда Германия Федеративтік Республикасының федералдық канцлерін сайлау және ант беру рәсіміне құрметті қонақ ретінде қатысатынын растай аламын, — деді өкіл.

Меркель мен Христиан-демократиялық одағының (ХДС) қазіргі көшбасшысы Фридрих Мерц арасындағы қарым-қатынас ұзақ жылдар бойы салқын болған. Мерц 2000–2002 жылдары ХДС парламенттік фракциясын басқарған кезде Меркельмен арада келіспеушілік туындап, ол саясаттан кеткен. Алайда 2018 жылдың соңында саясатқа қайта оралған. 23 ақпанда өткен мерзімінен бұрынғы парламент сайлауында Меркель ХДС/ХӘО блогының жеңісімен Мерцті құттықтады.

Сол күні Германияда өткен сайлауда ХДС/ХӘО блогы 28,5% дауыс жинап, бірінші орынға ие болды. Екінші орынға алғаш рет «Германия үшін альтернатива» партиясы (20,8%) шықты. Үшінші орынды қазіргі канцлер Олаф Шольцтың Социал-демократиялық партиясы 16,4% дауыспен иеленді. Одан кейін «Жасылдар» (11,6%) мен Солшыл партия (8,8%) орналасқан.

Айта кетелік Даниядан Германияға дейін жоғары жылдамдықты туннель салынып жатқанын жазған едік.