Министр Қарағандыда уланған балалардың жағдайын айтты

АСТАНА. ҚазАқпарат – Денсаулық сақтау министрі Ажар Ғиният Қарағанды облысындағы арнаулы әлеуметтік қызмет көрсету орталығында уланған балалардың жағдайы туралы айтып берді, деп хабарлайды ҚазАқпарат тілшісі.

«Бүгінгі таңда 13 баланың алтауы ауруханада жатыр. Олардың жағдайы ауыр. Балалар реанимация, қарқынды терапия бөлімшесіне орналастырылды. Екеуінің жағдайы ауыр әрі тұрақсыз», - деді Ажар Ғиният үкімет аясында.

Оның айтуынша, тергеу шаралары әлі жүргізіліп жатыр, тексеру аяқталған жоқ.

«Сот-медициналық сараптамасы әлі аяқталған жоқ, қорытынды шығарылмады. Балалар емделуде. Дәрігерлер болжам жасамайды, бірақ алты баланың төртеуі жақсарып келеді», - деп түйіндеді министр.

Естеріңізге сала кетейік, 30 шілдеде Қарағанды облысының балаларға арнаулы әлеуметтік қызмет көрсету орталығында бірнеше бала уланып, оның біреуі қайтыс болды, алтауы жансақтау бөлімінде жатыр.