Моңғол азаматы Қытайдағы салмағы ең ауыр адам атанды

АСТАНА. KAZINFORM — 33 жастағы моңғол азаматы — Юйчжоудың Қытайдағы салмағы ең ауыр адам деп танылғаны туралы жаңалық желі қолданушыларын елең еткізді.

Бұл жайында The Paper ақпараттық порталы хабарлады.

Ішкі Моңғолия өлкесінің тумасы — Юйчжоудың дене салмағы былтыр қараша айында 359,4 келіге жеткен. Анасының айтуынша, ол бала күнінен тығыршықтай толық болып өседі.

Университетке оқуға түскенде, бойының биіктігі 186 см-ге, дене салмағы 135 келіге жетеді. 2019 жылдан кейін оның дене салмағы тоқтамай, өсе береді.

Артық салмақтан төсек тартып жатып қалған Юйчжоудың өміріне қатер төнеді. Ол жүріс-тұрыстан мүлде қалған, тіпті көлікке де міне алмайтын халге түседі.

Ұлының өмірін сақтап қалу үшін анасы батыл шешім қабылдайды — өткен жылдың қараша айында арнайы дайындалған автокөлікпен 700 шақырым жолды артқа тастап, Юйчжоуды шалғайдағы Ордостан Бейжіңдегі Қытай-Жапония достық ауруханасына жеткізеді.

Медициналық қызметкерлердің жұмыла көрсеткен көмегінің арқасында Юйчжоу аурухана палатасына сәтті орналасып, жан-жақты тексеруден өтеді және ем-дом қабылдай бастайды.

Достық ауруханасының Жалпы хирургия бөлімшесінің зат алмасу және артық салмақтан арылу орталығының мамандары Юйчжоу үшін арнайы жоспар әзірлейді. Диета ұстау мен төсек үстіндегі жаттығулар оның қысқа мерзімде айтарлықтай салмақ тастауына көмектеседі.

48 күн бойы қажымай-талмай жаттығудың нәтижесінде Юйчжоу 104,4 келі салмақ тастайды, сөйтіп, оған ота жасауға мүмкіндік туады.

Жан-жақты дайындықтан кейін, дәрігерлер арнайы әзірленген лапароскопиялық құрал арқылы Юйчжоудың асқазанның бір бөлігін кесіп алып тастайды.

Отадан кейін Юйчжоудың жағдайы жедел жақсарып, салмағы тұрақты түрде төмендей бастайды. Қазіргі күнде оның дене салмағы 198 келіге түскен.

Осыған дейін Ұлттық статистика комитетінің мәліметі бойынша, Моңғолия халқының жалпы санының 1,7 миллионы немесе 49 пайызы ер адамдар екені анықталды.