Монополистер де әкімдер секілді тұтынушы алдында жыл сайын есеп беретін болады - ТМРА
Агенттік төрағасының айтуынша, бүгінгі күні ведомство арнайы заң жобасын әзірлеген. Заң жобасы тариф белгілеудің ашықтығы, реттелетін қызметтер сапасын арттыру және қаражаттың мақсатты пайдалануын бақылауды күшейту мәселелерін қарастырады.
«Бұл ретте біріншіден - әкімдердің есеп берулері секілді жария тыңдауларды және монополистердің жыл сайынғы міндетті есептерін өткізуге қатаң талаптар қоюды ұсынамыз. Сонымен қатар, электрмен жабдықтау бағалары өзгерген жағдайда жария тыңдаулар өткізу енгізілмек. Екіншіден - монополистер сатып алатын тауарлар, жұмыстар, қызметтер бағаларының жүйеленген тізбесін әзірлеу арқылы сатып алу ашықтығын арттыру қарастырылады. Үшіншіден - реттелетін нарық субъектілеріне және табиғи монополия субъектілеріне алдын ала төлемақы алуға тыйым салуды ұсынамыз. Төртіншіден - қызметке қосу кезінде монополистер келтіретін кедергілерді жою. Бұл ретте монополистерге веб-сайтта желілер мен жабдықтар жұмысының шамадан тыс көптігі, қуаттардың болуы және желілердің өткізу қабілеті туралы ақпаратты тоқсан сайын орналастыруға қосымша міндеттер енгізу ұсынылады», деді Мұрат Оспанов.