Мұхтар Мағауин — айрықша еңбегі бар айтулы қаламгер — Әбіш Кекілбайұлының естелігінен

АСТАНА. KAZINFORM — 2000 жылы көрнекті жазушы, мемлекет және қоғам қайраткері Әбіш Кекілбайұлы Қазақстанның халық жазушысы Мұхтар Мағауиннің мүшелтойына орай естелігін жазған.

Бұл естелікті Ә. Кекілбайұлының немересі Абыл Кекілбаев өзінің әлеуметтік желідегі парақшасында жариялады. 

— Әлі көз алдымда. Университетке жаңа түскенбіз. Бір-бірімізді жөнді білмейміз. Оқуды енді бастағалы жатырмыз. Күнгей беттегі аудитория. Терезе жақтағы соңғы қатар. Қасыма бидай өңді бейтаныс жігіт келді. Үстінде ши барқыт кеудеше. Басында жиегі кестеленген қазақы тақия. Бауырсақ мұрынның ұшы әнтек жылтырайды. Жымиып күліп тұрған сияқты. — Мен — Мұхтар Мағауинмін. Шұбартауданмын. Медалиспін. Отарда астықта болдым, — дейді ауызын ашар-ашпастан жәй-жапсарын түгел ақтарып. Содан қай сабақта да, қай аудиторияда да жұп жазбай бірге отыратын болдық. Ол жылы оқуға көбіне-көп екі жыл жұмыс істеген, әскерде болған сақа жігіттер алынған, — делінген Әбіш Кекілбайұлының қаламдас досының мүшелтойына орай жазған естелігінде.

Сонымен қатар онда әуелден-ақ әдебиетімізге көп нәрселерге тосын көзқарасымен, батыл пікірлерімен бөлекше көзге түсіп келген Мұхтар Мағауин — бүгінгі ұрпақтардың да, келешек ұрпақтардың да алдында айрықша еңбегі бар айтулы қаламгер екені аталып өткен.

— Мұхтар Мағауиннің өткен жайлы прозасы да, бүгін жайлы прозасы да дәл осы талапқа толығымен жауап береді. Оның романдары, әңгімелері мен хикаяттары төл әдебиетіміздің пайымдық-парасаттық деңгейін тереңдеткен, көркемдік-бейнелеушілік деңгейін биіктеткен сүбелі үлес болды, — деп аталып өткен мемлекет және қоғам қайраткерінің жазбасында.

Еске сала кетсек, 10 қаңтарда белгілі жазушы Мұхтар Мағауин АҚШ-та 85 жасында дүниеден озды. 

2021 жылы Әбіш Кекілбаевтың авиатор немересі Абылмен эксклюзив сұхбатты жариялаған едік.