Мұнайдың бағасы қашанға дейін құлдырайды? - баспасөзге шолу

***

Әлемдік экономикадағы қиындықтардың темір құрсауынан құтылар күн талайға арман болып тұр. Қабылданған шешімдер, қолға алынған бағдарламалар, ұтымды ұсыныстар, батыл бастамалар күрделі ахуалды оңтайландыруға жол ашар емес, деп жазады « Егемен Қазақстан » бүгінгі санындағы « Әбігерге түскен әлем » атты мақаласында.

Мақала авторының атап өтуінше, уақыт өткен сайын сөз бен істің арасы алшақтап барады. Басқаны былай қойғанда, АҚШ пен Еуроодақ елдерінің әрекетсіздігі әлемді әрі-сәрі күй кештіруде. Соңғы уақытта АҚШ-тың бірқатар ірі кәсіпорындары шығынға батып, амалсыздан жұмысшыларын барынша қысқартуда. Еуроаймақтың кейбір мемлекеттеріндегі жағдайлар, тіпті, бақылаудан шығып бара жатқандай. Бұл елдердің ішінде, әсіресе, Италияның халі мүшкіл. Сондай-ақ, жағдайы біршама тәуір деп есептелініп жүрген Германияда да қордаланған мәселелердің шеті көріне бастады.

***

Бүкіл әлемді қазір «қара алтынның» бағасы алаңдатып отырғаны анық. Бірақ сенім жоқ. Ғаламдық дағдарыс көп елдің экономикасына әсер етіп барады. Бірақ баға қашанға дейін төмен түспек? Бұл сұраққа « Айқын » газеті « Мұнайдың бағасы қашанға дейін құлдырайды? » деген мақалада жауап іздеп көрді.

Басылымның жазуынша, халықаралық энергетика агенттігінің дерегіне қарағанда, «баға енді құлдырай бермейді, ол өзінің соңғы кезеңіне жа­қын­дап қалды, содан кейін оның құлдырауы тоқтайды».

Үстіміздегі жылдың ор­тасынан бастап, баға аздап кө­теріле бастауы мүмкін, ал күрт артуы 2016 жылдан бастау ал­мақ. Бірақ қаншалықты ақиқат, ол жағы әлі мәлімсіз. Қазір бол­жам көп айтылғанымен, бәрі де шындыққа сәйкес келе бермей­ді. Тек нарықтың жай-жапсары мен даму барысын күтуден, ба­қылаудан басқа амал жоқ.

Сарапшылардың айтуына қарағанда, мұнай бағасының тө­мендеуі нарықтық экономи­каға әлі де өз әсерін тигізе бе­реді, тек 2016 жылдың соңына қарай жағдайдың тұрақталуына қатысты баға саясатында жа­ғым­ды процесс орын алады.

Алайда Халықаралық энер­гетика агенттігінің мамандары баға бұрынғы деңгейіне қайта орал­майды деп отыр. Мұнай­дың баға­сы 2020 жылға дейін көтеріліп, мұнайдың бір баррелі 73 долларға дейін барады. Мұ­ның себебі неде? Сарапшылар мұны мұнай шикізатына сұра­ныс­тың азаюы мен әлемдік экономиканың әлсіз дамуымен байланыстырып отыр.

Бірақ пікірлер әртұрлі, Citigroup агенттігінің сарапшылары мұнай бағасының сәл көтерілуі уақытша құбылыс, жақын уа­қыт­тарда мұнайдың WTI тү­рі­нің бағасы 20 долларға жетеді деп отыр.

Ұлттық анимацияның кенжелеп дамуы, соңғы жылдары түсірілген анимациялық фильмдердегі кемшіліктер, мультипликатор мамандардың болмауы - бүгінгі күннің өзекті мәселесіне айналған. Әмен Қайдаров негізін қалаған мектеп қайда? Ұлттық анимация саласында ілгерілеу бар ма? деген сауалдарға « Айқын » газетіне сұхбат берген белгілі режиссер-мультипликатор Қайырғали Қасымов жауап берді.

Кеңес Үкіметі кезінде «Қазақ­фильм» киностудиясының ұлт­тық анимациялық жеке бір­лестігі болды. Сол бірлестік қазақ мультфильмдерінің жарық көруі­не мүмкіндік берді. Қазір ұлттық анимация екіге жарылғандай: Ал­ма­ты қалалық тіл басқармасының дайындап, көрерменге ұсынып отырған анимациялық фильмдері бір бөлек те, «Қазақфильм» ки­но­с­тудиясы ұсынып отырған өнім­дері бір бөлек. Тіл басқармасының өнімдерін Артур Краус түсіріп жүр. Сценарий авторы да өзі, ре­жиссері де өзі. «Алдаркөсені» тү­сір­­ді, қазір батырлар жырына көш­­ті. «Қобыланды батыр», «Қам­­бар батыр» туралы анима­циялық фильмдер түсіруде. Бұл жерде түсірушілердің кінәсі емес. Тек бір өкініштісі, ұлттық фоль­клордың негізгі бейнесі ретінде «Алдаркөсені» жасағаны ғана өкі­ніш тудырады. Алдаркөсе қандай образ? Ол соншалықты айлакер ме, алаяқ па? Артур Краустың ұлт­тық фольклордан нақты хаба­ры болмауы да мүмкін. «Қазақ­фильм» киностудиясы ұсынып отырған анимациялық фильмдер­ге де көңіліміз толмайтыны рас», - дейді ол.

Оның айтуынша, жекеменшік студияларға кінә қоюға болмайды. Екіншіден, олар мультипликация саласын өз бетінше үйренді. Суретті қалай қимылдатуды, мультип­лика­ция­ның қалай жүзеге асырылуын өздері меңгерді. Олар ең бірінші рет «Алдаркөсені» түсірді. Олар­дың анимациялық фильм­дерін ел арасында көрсетуге әб­ден болады. Ал әлемдік деңгейге шығу үшін оларға көп ізденістер жасауы керек. Әлемдік деңгейге шығара алатын ұлттық мульт­фильмдерді «Қазақфильм» ки­но­с­тудиясында түсіруге болады. Өйт­кені онда негізгі база бар.

***

Рочертер университетінің ғалымдары компьютерге әлеуметтік желілерде отырған адамдардың көңіл күйін анықтауды «үйретті». Бұл туралы «Казахстанская правда» газеті жазып отыр.

Авторлардың айтуынша, қолданушылардың көңіл-күйін анықтау үшін қазір олар жазған мәтіндерді сараптаудың қажеті шамалы. Қазір көптеген адамдар өздерінің көңіл-күйін фотосуреттер емесе компьютердегі анимациялық суреттер арқылы білдіреді. Сондықтан ғалымдар әлеуметтанушыларға ендігі жерде сол суреттерге басты назар аударуды ұсынады.

Ойлап табылған алгоритм компьютерге салынған суреттердегі эмоцияларды анықтауға мүмкіндік береді. Сынақ көрсеткендей, компьютер суреттердегі эмоцияны бірнеше адамдардан гөрі жақсырақ анықтайтыны белгілі болды.

Мақала «Ученые «научили»компьютер оценивать человеческие эмоции» деген тақырыппен беріліп отыр.