Недовесов Португалияда жарыстың 1-ракеткасын жеңіп, финалға шықты
АСТАНА. KAZINFORM — Қазақстанның жұптық сындағы бірінші, әлемнің 44-ракеткасы Александр Недовесов сенсация жасап, Эшторил (Португалия) ATP 250 турнирінің финалына жолдама алды.
Отандасымыз эквадорлық Гонсало Эскобармен бірге жартылай финалда жарыстың бірінші ракеткалары, бельгиялықтар Сандер Жилле – Йоран Флигенді жолда қалдырды.
Қазақстандық-эквадорлық дуэт 1 сағат 10 минутқа созылған бәсекеде азулы қарсыластарын 6:2, 6:4 есебімен жеңді. Олар 2 эйспен бірге 5 брейк-пойнттың үшеуін мүлт жіберген жоқ. Бельгиялықтар 2 эйспен шектелді.
Александр мен Гонсалоның финалдағы қарсыластары кейін анықталады. Соңғы бәсеке 7 сәуірге белгіленген.
Еске сала кетейік, бұдан бұрын Александр Недовесовтің Португалиядағы жарыстың жартылай финалына өткенін жазған болатынбыз. Сондай-ақ Александр Бубликтің Монте-Карлодағы қарсыласы белгілі болды.
