Несиесін төлеу кезінде қиындыққа тап болған БҚО тұрғыны өзін өлгендер тізімінен тапқан
ОРАЛ. KAZINFORM – Жаңақала ауданының тұрғыны Гүлайна Айтасова банкке несиеcін төлеу кезінде қиындыққа тап болған. Бұл туралы ол әлеуметтік желісіндегі парақшасында жазды.
Жаңақала ауданы тұрғынының сөзінше, банкке төленген несие өз есепшотына қайта аударылған.
«Несиемді ай сайын төлейтін едім. Ақшам қайтып келгеннен кейін қайта төледім. Есепшоттан кері алынбай тұр. Операторларға хабарлассам, «4 шілде күні Астанадағы ауруханада қайтыс болған деп шығып тұрсыз. Енді АХАТ-қа, мемлекеттік кірістер басқармасы, ХҚКО-ға барыңыз», - дейді. Мен тірі адаммын. Жалақымды алып отырмын, каспиім де ашық. Ауруханаға барсам, онда да «қайтыс болды» деп шығып тұрғанын айтты. Олар мені білетін болған соң, көмектесіп, дәрілерімді берді. Қан қысымы бойынша есепте тұрмын. Зейнет жасына жақындап келе жатырмын. Жинағым қалай болады, бәріне алаңдап отырмын», - дейді Г.Айтасова.
«Азаматтарға арналған үкімет» мемлекеттік корпорациясы» КЕАҚ БҚО филиалынан мәлім еткеніндей, азаматтардың өлімі туралы мәліметті мемлекеттік деректер базасына ҚР Денсаулық сақтау министрлігінің қызметкерлері енгізеді.
«Жаңақала ауданының тұрғынына қайтыс болғаны туралы хабарлама берілуіне байланысты уәкілетті мемлекеттік органға хабарласуы қажет. Деректер базасында жеке сәйкестендіру нөмірін нақтылау үшін емханаға жүгіну керек», - деп хабарлады ведомстводан.
